Сăваплăхшăн тата тивĕçлĕхшĕн тăнă кĕрешÿре сана чи шаннă çынсем сутрĕç пулсан та, сан йери-тавра тăшмансем пулсан та, эсĕ тăр пĕччен тăрса юлтăн пулсан та, — ан парăн! Пĕл: эсĕ нихăçан та пĕччен юлмăн, санăн юн тымарĕсенче несĕлÿсен, сăваплă арсен юнĕ юхать! Çав юн сана нихăçан та сутмĕ, кирек мĕнле йывăрлăхра та çăлĕ! Эсĕ те çак юна ан сут!
Несĕлсен пехилĕ
Ашшĕ-амăшĕ пиллесен — пин пулать, пиллемесен — кĕл пулать.
Çĕклĕнтĕн хăв, çĕкле хăвăн йăхна.
Хура çăкăр çиекен хура пулман тет.
Ҫӗртме уйӑхӗн 30-мӗшӗнче Тенеяльне пысӑк хӑнасем килсе кайрӗҫ. Ялти тӗне кӗмен чӑвашсен йӑли-йӗркипе паллашма Пӑлхар ҫӗр-шывӗнчи София хулинчи паллӑ ӑсчахсем кӑмӑл тунӑ: Ружа Нейкова профессор, Болгари наука академийӗн этнографӗсем Иво Леонкев тата Славян Стоилов. Вӗсемпе пӗрле ЧПУ профессорӗ, истори наукисен докторӗ Геннадий Ильич Тафаев, Атӑлҫи Пӑлхар обществӑлла фондӑн учредителӗ Юрий Витальевич Дадюков, фондӑн яваплӑ секретарӗ Анатолий Павлов пулчӗҫ.
Ялти клуб умӗнче хӑнасене чӑваш тумӗ тӑхӑннӑ ҫамрӑксем ҫӑкӑр-тӑварпа кӗтсе илчӗҫ, чӑваш сӑрипе сӑйларӗҫ. Ял-йыш та нумай пуҫтарӑннӑ. Пӑлхар хӑнисем хӑйсемпе тата вӗсем мӗнле тӗллевпе килнипе паллаштарчӗҫ. Г. И. Тафаев профессор Атӑлҫи пӑлхар чӑвашӗсем ҫинчен питӗ инстереслӗ те ӑнланмалла каласа пачӗ. Ружа Нейкова профессор пӑлхар халӑхӗпе чӑваш халӑхӗ хушшинчи пӗрпеклӗхсене палӑртрӗ, йӑла-йӗркесен, кӗпе-тумтир ҫинчи эрешсен, пуҫа тӑхӑнмалли тухьян, хушпун пӗрпеклӗхӗ ҫинчен ӑнлантарчӗ. Хӑнасем Тенеялӗнчи чӑвашсен авалхи юрри-ташшипе интересленчӗҫ, уявсене мӗнле ирттерни пирки ыйтса пӗлчӗҫ. Ялти ватӑсемпе пӗрле культура ҫурчӗ ҫумӗнчи художество пултарулӑх членӗсем ӗлӗкхи юрӑсене юрласа, ташӑсене кӑтартса пачӗҫ. Уйрӑмах Клавдия Ахтямова, Таисия Нестерова, Фекла Андреева, Анастасия Иванова, Перасковья Афонова, Елизавета Васильева тата ыттисем те питӗ хастар хутшӑнчӗҫ. Хӑнасем чӑваш масарӗ пирки ыйтса пӗлчӗҫ, авалхи чӳк вырӑнӗсемпе интересленчӗҫ, анчах шел, ҫав вырӑнсен паллисем хальхи вӑхӑтра сыхланса юлман. Апла пулин те ялти ватӑсем авалхи чӳк вырӑнӗсем хӑш вырӑнта пулнине, мӗнле чӳк тунине каласа ӑнлантарчӗҫ.
Ялти масар ҫине ҫитсе килчӗҫ хӑнасем, тӗне кӗмен чӑвашсен вил тӑприйӗсемпе паллашрӗҫ. Авалхи чӑвашсен вил тӑприйӗ ҫинчи чул юпана курсан тӗлӗнмеллипех тӗлӗнчӗҫ, вӗсен те ҫавӑн пек чул юпасем пуррине каларӗҫ, пӗрпеклӗхсем тупрӗҫ, ӳкерсе илчӗҫ.
Ялти библиотекарь Ю. Н. Егорова клубра фойере «Тӑван халӑхӑн ылтӑн ҫӳпҫи» ятлӑ выставка йӗркеленӗ. Ҫак выставкӑн содержанийӗ пӑлхарсемпе чӑвашсен историйӗпе ҫыхӑннӑ. Тафаев профессор выставкӑпа питӗ кӑмӑллӑ юлчӗ, уйрӑмах хӑй кӑларнӑ «Пӑлхар» ятлӑ кӗнеке библиотекӑра пулнӑшӑн питӗ савӑнчӗ. Хӑй ҫӗнӗрен кӑларнӑ «Цивилизационный путь развития чувашского народа» кӗнеке парнелесе хӑварчӗ. Ю. В. Дадюков (Татюк Юрки) Юхма Мишшипе пӗрле кӑларнӑ «Некей — паттӑр ялавӗ» кӗнеке парнелерӗ. Пӑлхар хӑнисене хамӑр чӑваш апачӗсене пӗҫерсе ҫитерме тӑрӑшрӑмӑр. Кӑвайт ҫинче пӗҫернӗ какай шӳрпи, картлӑ курӑкпа вӗретнӗ чей, кӑпӑклӑ сӑра, чӑваш пылӗ вӗсене питӗ килӗшрӗ. Светлана Гурьева вӗретнӗ чӑваш сӑри пурин кӑмӑлне те кайрӗ. Ялти активистка Валентина Павлова питӗ нумай пулӑшрӗ хӑнасене тараватлӑн кӗтсе илсе ӑсатса ямашкӑн. Тӗл пулӑва Тӑвай район депутачӗсен Пухӑвӗн депутачӗ Светлана Павловна Орлова та килчӗ. Вӑл туслӑх уявне ирттерме спонсорла пулӑшу пачӗ. «Новый путь» хуҫалӑх ертӳҫи Л. И. Григорьев та укҫа-тенкӗпе пулӑшрӗ.
Тӗл пулӑва хутшӑннӑ ял халӑхне пурне те питӗ пысӑк тав сӑмахӗсем калас килет Пӑлхар ҫӗр-шывӗн хӑнисене ҫапла кӑмӑллӑ кӗтсе илсе ӑсатнӑшӑн.
Сӑн ӳкерчӗксенче: Пӑлхар хӑнисене ҫӑкӑр-тӑварпа тата чӑваш сӑрипе чаплӑн кӗтсе илнӗ вӑхӑтра; туслӑх ялавӗсемпе.
Р. ЕРМОЛАЕВА, Тенеялӗнчи клуб администраторӗ.
В. ПАВЛОВА сӑн ӳкерчӗкӗсем.
АУ Чувашской Республики «Редакция Янтиковской районной газеты «Сельский труженик».
