Кĕр сăри (чÿклеме)

ĕпĕкхи йăлапа

Кĕр сăри (чÿклеме)

Атан сăрипе Çурта кунĕ сыпăкранах Кĕр сăрине куçса пырать. Юпа уйăхĕн вĕçĕнче е чÿк уйăхĕн пуçламăшĕнче — уй-хире тасатса кĕнĕ хыççăн çĕн уйăхпа ирттереççĕ.

Кĕрхи чÿклемере ваттисене хывнă каçа «кĕр сăри каçĕ» тенĕ.

Чÿклемере малтан сĕтел çине пĕр витре сăра ăсса лартаççĕ. Унтан мĕнпур хăнисене пĕрер курка сăра тултарса параççĕ. Тепĕр аллине çĕнĕ тырăран пĕçернĕ çăкăрпа тăвар тыттараççĕ. Кил хуçи сĕтел хушшине кĕрсе ларать те калать: «Алăк патĕнчи алпассисем, сире ал валли çитсе-и?» Хăнисем: «Çитсе, çитсе, сире — иккĕ, пире — пĕрре». Унтан малта ларакан хăнисене: «Тĕпелти арманкассисем! Сирĕн пата та ал валли ярса, çитсе-и?»
— «Çитсе, çитсе, сире — иккĕ, пире — пĕрре!».

Кĕр сăри (чÿклеме)Вара кĕлтăвать:

Ял-йыш-пускилпе пĕрле шăкăлтатса ĕçсе çиме, Турă, пулăш. Акнă тырă хулăн пултăр, çичĕ тĕслĕ тырă сĕчĕпе асăнатпăр. Çур акнинчен савăнтар, кĕр акнинчен савăнтар. Çĕнĕ тырă-пулă перекетне пар. Кайран каласси малтан пулнă пулĕ, малтан каласси кайран пулнă пулĕ. Пирĕн алăра кĕнеке çук. Турă, каçар пире.

Халĕ çак уява нумай çĕрте ирттермеççĕ, илтменнисем те нумай. Сцена çинчен йăла-йĕрке сценкине кăтартни те питĕ сахал.

Сăмахран, октябрĕн 14-мĕшĕнче Самар облаçĕнчи Тольятти хулинче çак праçнике асăнса Чÿклеме ирттернĕ.

Православи тĕнĕпе пурăнакансем вара октябрĕн 14-мĕшĕнчен пуçласа 21-мĕшĕччен Пукрав эрнине ирттереççĕ. Тăван-хурăнташ, хăта-тăхлачсем патне хăнана çÿреççĕ. Хур-кăвакал пусса сăйланаççĕ.

Светлана Элшел.
Автор архивĕнчи сăнÿкерчĕксенче
Тольяттинче иртнĕ Чÿклеме каçĕнчи самантсем.

Сувар. — 2012. — Юпа, 19.