Пур предмета та чăвашла

Çарăмсан районĕнчи Йăвашкел шкулĕÇарăмсан районĕнчи Йăвашкел шкулĕ 1980 çулта хута кайнăранпа кал-кал ĕçлет. Çав вăхăтранпа шкулта тĕп юсав пулман. Апла пулин те шкул администрацийĕ кашни çулах пĕчĕк-пĕчĕк юсавсем ирттерет, çавăнпах шкул çурчĕ тирпейлĕн, хăтлăн курăнать. ТР Президенчĕн программипе пуçарнă шкулсенчи тĕп юсав 2013 çулта Йăвашкелне те çитмелле. Шкул директорĕ ăна тума документсем те хатĕррине, район пуçлăхĕ те килĕшсе алă пуснине хавасланса каласа пачĕ. Çак вĕренÿ çулĕ вĕçленнĕ çĕрелле, май уйăхĕнче, юсава пуçăнасшăн.

Халĕ шкулта 117 ача вĕренет. 2012 çулта 5 вĕренекен ППЭ ăнăçлă парса (пĕлтĕр кăтартусем тата лайăхрахчĕ тесе каласа пачĕç пире) шкулпа сывпуллашнă. Çĕнĕ вĕренÿ çулне вара 8 çĕнĕ вĕренекен хушăннă. Шкулсене оптимизацилессипе хăратнă тапхăрта вĕренекенсен йышĕ ÿсни чăннипех савăнтарать йăвашкелсене.

Шкул этнокультура сулăмĕпе ĕçлекеннисен шутне кĕрет, тăван ен халăхĕсен культурине тĕпчесси çине пусăм тăваççĕ кунта. Çавăнпа кĕçĕн классенче математика, çут çанталăк предмечĕсене те чăвашла вĕрентеççĕ.

Шкул директорĕ Вячеслав Варфоломеевич Антонов çак ялтах çуралса ÿснĕ. 1974 çулта Хусанти педагогика институтĕнчен вĕренсе тухнăранпа, тăван шкулта ĕçлет вăл, директор должноçне ларнăранпа та 27 çул çитнĕ те. Пуçлăх хăйĕн ĕçне лайăх пĕлни курăнать. Вĕренÿ программине туллин пурнăçлама компьютер класĕ те, интерактивлă доскасем те, ытти хатĕр-хĕтĕр те пур. Ялти фермерсем те пулăшма ыйтсан хирĕçлемеççĕ. Вĕрентекенсен коллективĕ çамрăк, анчах опыт пухма ĕлкĕрнĕ те ĕнтĕ. Кашни учитель хăйĕн предметне лайăх пĕлет. Республика шайĕнче иртекен конкурссенче грантсем çĕнсе илеççĕ. Кĕçĕн классене вĕрентекен Ирина Анатольевна Ефремова кăçал «Наш лучший учитель» конкурсра ТР Вĕрентÿпе наука министерствин грантне çĕнсе илнĕ.

Шкул вĕренÿре кăна мар, ачасене тĕрĕс воспитани парассипе тăрăшать. Кунта каçхине 7 сехетчен те ачасен шăв-шавĕ шăпланмасть. Тĕрлĕ-тĕрлĕ кружоксем ĕçлеççĕ. Арçын ачасене йывăçран каскаласа ăсталама вĕрентеççĕ, хĕр ачасем валли те интереслĕ ĕçсем тупăнсах тăраççĕ. Йăвашкел шкулĕнчи Валентина Макарова ертсе пыракан хор кружокне çÿрекенсем те йышлă, чăн та, юрлама ытларах хĕр ачасем юратаççĕ курăнать.

Ачасен хул-çурăмне аталантарасси çине те тимлĕх уйăраççĕ кунта. Шкулти волейбол секцийĕ те районта вăйлисенчен пĕри, хĕллехи спорт тĕсĕсем те лайăх аталаннă. Хĕле кĕрсен шкул картишĕнче ачасемпе вĕрентекенсен вăйĕпе каток шăнтаççĕ. Физкультура урокĕсене ирттерме те, каннă вăхăтра конькипе ярăнма та лайăх унта. Йĕлтĕр çинче те çирĕппĕн тăраççĕ йăвашкелсем, ăмăртусенче çĕнтересси те вĕсемшĕн çĕнĕлĕх мар.

Тĕп юсав хыççăн шкулăн столовăйĕ те, туалечĕсем те пĕр çуртра пулĕç. Анчах паян «нуша килсен» те урама чупма тивет, столовăйĕ те картиш урлă. Чылай çĕрте шкул çуртĕнчех ача садне уçнă. Йăвашкелĕнче вара апла мар. Шкула хирĕç ларакан çуртра столовăй, ача сачĕ тата ФАП. Фельдшерпа акушер пункчĕ ача учрежденийĕсемпе юнашар пулни питĕ аван. Чир-чĕр палли асăрхасанах шурă халатлă сиплевçĕсем патне васкама пулать. Сăмах май, кăçал унта 100 пин тенкĕлĕх юсав ĕçĕсем ирттернĕ.

Вĕрентекен кунне шкулта кашни çулах чыслăн уявлаççĕ. Ялти клубăн сцени çинчен вĕренекенсем юратнă учительсене саламлаççĕ, концерт лартса параççĕ. Кăçал та вĕренÿ çулĕ пуçлансанах ачасем çак уява хатĕрленме пуçланă. Уйрăмах хор кружокне çÿрекенсем ку енчен хастарлăх кăтартаççĕ.

Татьяна ТАРАСОВА.
Автор сăнÿкерчĕкĕ.