Сăваплăхшăн тата тивĕçлĕхшĕн тăнă кĕрешÿре сана чи шаннă çынсем сутрĕç пулсан та, сан йери-тавра тăшмансем пулсан та, эсĕ тăр пĕччен тăрса юлтăн пулсан та, — ан парăн! Пĕл: эсĕ нихăçан та пĕччен юлмăн, санăн юн тымарĕсенче несĕлÿсен, сăваплă арсен юнĕ юхать! Çав юн сана нихăçан та сутмĕ, кирек мĕнле йывăрлăхра та çăлĕ! Эсĕ те çак юна ан сут!
Несĕлсен пехилĕ
Ашшĕ-амăшĕ пиллесен — пин пулать, пиллемесен — кĕл пулать.
Çĕклĕнтĕн хăв, çĕкле хăвăн йăхна.
Хура çăкăр çиекен хура пулман тет.
Атӑл леш енче, йӑлӑм ӗшнинче
Кӑкшӑм ятлӑ вӑрӑм кӳлӗ пурччӗ,
Кӳлӗри шур чечеклӗ кӳкӗрчен
Сарӑ шӑркипеле илӗртетчӗ.
Ҫыр ҫийӗнчен лӗпӗшсем вӗҫетчӗҫ
Илӗртӳллӗ кӳкӗрчӗне савса,
Йӗп вӑррисем пӗр харӑс тухатчӗҫ
Вӗсене кӗтмен ҫӗртен шуйхатса.
Атӑл шывӗ ГЭС хыҫҫӑн хӑпарсан
Ҫут кӑкшӑм кӳлӗ ҫухалчӗ путса,
Кӳкӗрчен шывпа кайрӗ пуль юхса
Хӑйне валли хӳтӗлӗх шыраса.
