Сăваплăхшăн тата тивĕçлĕхшĕн тăнă кĕрешÿре сана чи шаннă çынсем сутрĕç пулсан та, сан йери-тавра тăшмансем пулсан та, эсĕ тăр пĕччен тăрса юлтăн пулсан та, — ан парăн! Пĕл: эсĕ нихăçан та пĕччен юлмăн, санăн юн тымарĕсенче несĕлÿсен, сăваплă арсен юнĕ юхать! Çав юн сана нихăçан та сутмĕ, кирек мĕнле йывăрлăхра та çăлĕ! Эсĕ те çак юна ан сут!
Несĕлсен пехилĕ
Ашшĕ-амăшĕ пиллесен — пин пулать, пиллемесен — кĕл пулать.
Çĕклĕнтĕн хăв, çĕкле хăвăн йăхна.
Хура çăкăр çиекен хура пулман тет.
Атӑлҫи пӑлхарсен кашни ҫемйинче
Ашшӗ ҫулталӑк тултарнӑ ывӑлӗн
Ҫӳҫне хачӑпа каснӑ тӗпеклетсе
Сылтӑм енчи ӑшӑ тӑнлав тӗлӗнче.
Ман атте-аннен пилӗк ывӑл пулнӑ;
Ҫулталӑкри кашни ывӑлӗн ҫӳҫне
Касса хачӑпа пӗр тикӗс кӗскетнӗ
Тӗпеклетсе ачаш тӑнлав ҫийӗнче.
Ҫӳҫне касас умӗн ывӑлӗ туйса
Пачах итлемест, аллине тӑратса
Чупать анне патне хӳтлӗх шыраса,
Саппун айне курӑнми пытарӑнса.
Атте аннене куҫ хӗссе систерет
Ывӑла хӑйӗн патне йӑтса пыма,
Тытса пырсан чӗркуҫҫи ҫине лартать,
Кӑтра ҫуҫлӗ пуҫне ӑшшӑн ыталать.
Илемлӗн те хитрен ҫӳҫне кӗскетсе
Килӗшӳллӗ чипер тӗпек хӑварать,
Чуп туса сӑпка юррипе пиллесе
Вӑйпитти, паттӑрлӑх, хӑюлӑх сунать.
Атӑлҫи пӑлхарсен кашни ҫемйинче
Ашшӗ ҫулталӑк тултарнӑ ывӑлӗн
Ҫӳҫне хачӑпа каснӑ тӗпеклетсе
Сылтӑм енчи ӑшӑ тӑнлав тӗлӗнче.
