Сувары

Чӑваш наци библиотекинче ЧР тава тивӗҫлӗ художникӗн, Ҫеҫпӗл Мишши ячӗллӗ Чӑваш комсомолӗн премийӗн лауреачӗн Юрий Ювенальевӑн «Военное искусство суваро-булгар - предков чувашей», «Ювелирное искусство суваро-булгар - предков чувашей» тата ЧР культурӑн тава тивӗҫлӗ ӗҫченӗн, культурологи кандидачӗн Владимир Алмантайӑн «Культурная идентичность суваро-чувашей в условиях глобализации» кӗнекесен презентацийӗ иртрӗ. Хӑтлав каҫне сувар-пӑлхарсен, чӑвашсен Х-ХХ ӗмӗрсенчи кӗмӗл капӑрчӑкӗсен куравӗ илем кӳчӗ. Асӑннӑ ювелир хатӗрӗсем - Раҫҫей тава тивӗҫлӗ художникӗн, Чӑваш халӑх художникӗн Владислав Николаевӑн пуххинчен.

«Аваллӑха, несӗлӗрсем мӗнле пурӑннине тӗпчӗр - ҫакӑ сире тата йӑхташӑмӑрсене пуласлӑха ҫул уҫма пулӑшӗ», - тенӗ техника наукисен докторӗ, Василий Николаев академик. Паянхи ӑру Василий Васильевичӑн сӑмахне шута илет, историе, культурӑна, йӑла-йӗркене шӗкӗлчет.

Людмила Семёнова хатӗрленӗ «Ӗмӗр сакки сарлака» передачӑн 2018 ҫулхи «Асӑну ҫӳревӗ» ҫинчен «Суварсем» ятлӑ кӑларӑм.

Ҫӗрпӳ районӗнчи чӑваш чӗлхи вӗрентекенӗсем Шупашкар районӗни Станьял ялӗ ҫывӑхӗнче вырнаҫнӑ Чемен картинче ҫулҫӳревре пулчӗҫ. Вӗсене Чӑваш Енри таврапӗлӳҫӗсен пӗрлӗхӗн ертӳҫи Сергей Сорокин ӑшшӑн кӗтсе илчӗ, музей историйӗпе тата унти экспонатсемпе тӗплӗн паллаштарчӗ.

ЧР Наци вулавӑшӗн фончӗ ҫӗнӗ кӗнекепе пуянланнӑ. Вӑл питӗ кирлӗ те усӑллӑ кӗнеке — "Культура суваро-булгар. Этнические имена и их значения". К. В. Иванов ячӗлле историпе культура фончӗн ячӗпе кӑларнӑ темиҫе кӑларӑма вулавӑша чӑвашсен паллӑ таврапӗлӳҫи, тӗпчевҫи Владимир Алмантай (Иванов) парнеленӗ.

Вӑл вулавӑшпа темиҫе ҫул ӗнтӗ тачӑ ҫыхӑнура. Ку — вӑл парнеленӗ 7-мӗш кӗнеке. Кӗнеке шӑранса тухиччен чылай тар тӑкма тивнӗ. "Ҫынсен ячӗсем — халӑх историйӗн пӗр пайӗ, этника ячӗсенче тата географи ячӗсенче халӑхӑн культурипе йӑли, унӑн тата ытти халӑхӑн ҫыхӑнӑвӗ курӑнать", — тет Владимир Алмантай.